Braziliýada karnawal hepdesi – bu Latyn Amerikasy ýurdunyň iň meşhur aýratynlyklarynyň birine öwrülen şowhunly baýramçylyk çäresi başlandy.
Elbetde, tanslaryň we şowhunyň geçirilýän ýeri Rio-de-Žaneýro bolup, her ýylda köp sanly samba mekdepleriniň giň gerimli teatrlaşdyrylan çykyşlary syýahatçylary we ýerli ýaşaýjylary haýran galdyrýar. Bu mekdepleriň okuwçylary ýylyň dowamynda taýýarlyk görýärler – geýim tikinýärler, horeografiýa hereketlerini kämilleşdirýärler, geljekdäki çykyşyň esasy mowzugyny saýlaýarlar, tans meýdançalaryny dizaýn edýärler we gurýarlar (elbetde, hünärmenleriň gatnaşmagynda).
Karnawal ýekşenbe güni agşam alty sany samba mekdebiniň wekilleriniň dabaraly ýörişi bilen açyldy. Çykyşlar Rio şäheriniň şaýollarynyň birinde 100 müňe golaý tomaşaçyny özüne çekdi. Tans dili arkaly tansçylar tomaşaçylara orta asyr portugal ertekilerini, Braziliýada ýaşaýan ýanomami indeý halkynyň hekaýalaryny, dünýäniň döreýşi baradaky indeý miflerini we sygan halkynyň folkloryny gürrüň berdiler.
