Meşhur amerikaly režissýor Tim Býorton 1958-nji ýylda ekrana çykan “50 futluk aýalyň hüjümi” (“Attack Of The 50-ft. Woman”) ylmy-fantastiki filminiň täze wersiýasyny surata düşürmäge girişer. Bu barada RBK Life habar berýär.
Film özge dünýäden gelen bilen duşuşykdan soň ägirt uly ölçege çenli ulalyp başlaýan baý mirasdüşer Nensi Arçer barada gürrüň berýär. Onuň öňem kynçylyklardan doly durmuşy hasam tragiki we howply bolýar.
“Edward gaýçy eller”, “Alisa täsinlikler dünýäsinde” ýaly özboluşly filmler bilen belli bolan Býorton öz remeýkini has häzirkizaman we sosial taýdan ähmiýetli etmegi wada berýär. Şeýle-de, ol asyl nusganyň atmosferasyny saklamak üçin filmi gara-ak görnüşde surata düşürmek isleýär.
Film üçin ssenariýany “Ýiten gyz” we “Ýiti predmetler” bestsellerleriniň awtory, “Wednesday” serialynyň ssenariýaçysy Gillian Flinn ýazar. Ol baş gahrymany ýüze çykan ýagdaýlaryň pidasy däl-de, has güýçli we garaşsyz etmek isleýändigini aýtdy.
Häzirlikçe täze filmde Nensi Arçeriň keşbini kimiň ýerine ýetirjekdigi belli däl. Asyl filmde ony Ellison Heýes ýerine ýetirdi. Mümkin dalaşgärleriň arasynda Enn Heteueý, Şarliz Teron, Emma Stoun ýaly aktrisalar bar.
“50 futluk aýalyň hüjümi” filmini 2025-nji ýylda prokata çykarmak meýilleşdirilýär. Ol Býorton bilen filmleri we seriallary döretmek üçin eksklýuziw şertnama baglaşan Netflix striming hyzmaty arkaly ýaýradylar.
