Dünýäde iki milliarddan gowrak iPhone, iPad, Mac we beýleki Apple gurluşlaryny işjeň ulanyjylar hasaba alynýar. Bu barada kompaniýanyň 2024-nji maliýe ýylynyň birinji çärýegi üçin ýitgileri we girdejileri baradaky hasabatyna salgylanyp, MacRumors neşiri habar berýär.
“Biz işjeň gurluşlar bazamyzyň 2,2 milliarddan geçip, ähli önümler we geografiki segmentler boýunça rekord derejä ýetendigini habar bermäge şat” – diýip, kompaniýanyň baş müdiri Tim Kuk belledi.
2,2 milliard işjeň gurluş kompaniýa üçin täze rekorddyr. Soňky gezek Apple işjeň ulanyjylaryň sanyny 2023-nji ýylyň ýanwar aýynda mälim etdi, şonda kompaniýa dünýäde 2 milliard ulanylýan gurluşy hasaba aldy.
Neşir kompaniýanyň aýry-aýry gurluşlar boýunça sanlary hödürlemändigini, ýöne dünýäde eýýäm milliarddan gowrak işjeň iPhone-yň bardygyny belleýär.
Häzirki wagtda Apple-iň iň täze önümi Apple Vision Pro garniturasydyr. Ol 2024-nji ýylyň 2-nji fewralynda satuwa çykdy. Täze ýyla çenli kompaniýanyň 500 müňe golaý gurluş satyp bilmegine garaşylýar.
