TikTok gysga wideo hyzmaty TikTok Shop-da satyn almak üçin baglanyşyk birikdirip, wideolardaky önümleri awtomatiki kesgitlemek aýratynlygyny synagdan geçirýär diýip, Bloomberg-e salgylanýan 3DNews habar berdi.
Platformanyň ulanyjylary şeýle aýratynlygyň ýüze çykandygyny geçen ýylyň noýabr aýyndan bäri habar berip gelýärler we “TikTok Shop-dan şuňa meňzeş harytlary tapyň” diýip çykýan düwme sentýabr aýyna degişli wideolarda göründi. Platformanyň wekilleri bu aýratynlygy Angliýada we ABŞ-da az sanly ulanyjy bilen synap görýändiklerini habar berdiler.
Häzir ABŞ-da TikTok Shop-yň awtorlara öz wideolaryna önümlere baglanyşyk goşmaga mümkinçilik berýän bölümi açyldy, ýöne bu mümkinçiligi almak üçin awtorlar we brendler TikTok-yň administrasiýasynyň makullamasyny almaly. Wideodaky harytlary awtomatiki kesgitlemek platformadaky elektron söwdanyň mümkinçiliklerini ep-esli giňelder. Kompaniýa ABŞ-daky satuwlaryny 2024-nji ýylda 17,5 milliard dollara ýetirmegi meýilleşdirýär.
Söwda teklipleri aýratynlygy Pinterest-e, Google Lens-iň gözleg bölümlerine we onuň has täze wersiýasy Circle to Search-e ornaşdyrylýar. Hytaýyň sosial ulgamynda bu aýratynlyk kemçilikler bilen işleýär. Mysal üçin, bir aýalyň daşlary ýalpyldadyp-ýylmaýan wideosynda ulgamyň altyn ýüzük we ýasama dyrnaklary teklip edendigi bellendi.
