Katarda futbol boýunça Aziýanyň Kubogy dowam edýär. Sişenbe güni, 30-njy ýanwarda ýaryşyň 1/8 finalynda El-Wakradaky "El-Janub" meýdançasynda Özbegistan 2:1 hasabynda Tailandy utdy.
Hasaby 37-nji minutda özbek toparynyň oýunçylary açdy, Azizbek Turgunbaýew gol geçirdi. 65-nji minutda ýeňiş goluny tora Abbosbek Faýzullaýew girizdi.
Tailand üçin ýeke-täk goly hasabyna Supaçok Saraçat ýazdy (58-nji minut).
Şeýlelik bilen, Özbegistanyň milli ýygyndysy dörtden bir finala çykdy we indi Kataryň topary bilen duşuşar.
Günüň ikinji oýny Er-Raýýandaky "Edýukeýşn Siti" stadionynda Saud Arabystanynyň we Günorta Koreýanyň milli toparlarynyň arasynda geçirildi. Bu oýnuň esasy we goşmaça wagty 1:1 hasabynda tamamlandy. Penalti tapgyrynda koreýalylar üstün çykdy (4:2).
Bu oýunda birinji goly arakesmeden soň 46-njy minutda Saud Arabystanynyň hüjümçisi Abdulla Radif geçirdi. Oýnuň 90+9-njy minutynda Çho Kýu Sun hasaby deňledi.
Ýaryşyň indiki tapgyrynda Günorta Koreýanyň topary awstraliýalylar bilen duşuşar.
