10-njy ýanwarda «Türkiye Bursları» (Türkiýäniň talyp haklary) talyp hakly maksatnamasy boýunça türk ýokary okuw mekdeplerinde bilim almak üçin arzalar kabul edilip başlandy. Arzalar 20-nji fewrala çenli «Türkiye Bursları» maksatnamasynyň web sahypasynda mugt kabul edilýär.
«Türkiye Bursları» maksatnamasynyň esasy maksady dünýäniň dürli künjeklerinden üstünlikli talyplara Türkiýede halkara standartlary esasynda talyp hakly uniwersitet bilimini almak üçin deň mümkinçilikleri döretmekden ybaratdyr. Mundan başga-da, maksatnama Türkiýe bilen beýleki ýurtlaryň arasyndaky özara hyzmatdaşlygy pugtalandyrmak hem-de ylym, sungat, ykdysadyýet, edebiýat, tehnologiýalar we binagärlik ýaly dürli ugurlarda sebitleýin we global ösüşe goşant goşmaga gönükdirilendir.
«Türkiye Bursları» dünýädäki iň giň gerimli maksatnamalaryň biri hasaplanýar. Ol aýlyk talyp haklaryny, uniwersitetde bilim almagyň töleglerini, saglyk ätiýaçlandyryşyny, ýaşaýyş jaýynyň çykdajylaryny, türk dili boýunça okuwlary, awiapetekleri hem-de mugt akademiki we medeni maksatnamalary öz içine alýar.
Her ýyl 160-dan gowrak ýurtdan müňlerçe daşary ýurtly talyp «Türkiye Bursları» üçin ýüz tutýar. Maksatnama her ýylda, takmynan, 5000 daşary ýurtly talyba talyp hakyny berýär.
Bu maksatnama Türkiýe Respublikasynyň Hökümetiniň ýanyndaky Daşary ýurtlardaky türkler we garyndaş jemgyýetler boýunça Prezidium (YTB) tarapyndan amala aşyrylýar.
Maksatnama gatnaşmak üçin arzany www.turkiyeburslari.gov.tr web sahypasynda resmileşdirmek mümkindir.
