22-nji ýanwarda “Türkmenhimiýa” döwlet korporasiýasy Ýaponiýanyň Kawasaki Heavy Industries, Ltd. we ITOCHU Corp. korporasiýalary bilen tebigy gazdan benzin öndürýän zawodyň we dökünleri öndürýän zawodlaryň gurluşygy bilen baglanyşykly ähtnama baglaşdy. Resminama gol çekmek dabarasy Tokioda geçirildi diýip, Orient habar berýär.
Gol çekişme Türkmenistanyň wise-premýeri, daşary işler ministri Raşid Meredowyň we Ýaponiýanyň ykdysadyýet, söwda we senagat ministri Ken Saýtonyň gatnaşmagynda geçirildi. Bu resminamadan öň olar Türkmenistan bilen Ýaponiýanyň arasynda baglaşylan energetika geçişi baradaky Ähtnama gol çekdiler.
Taraplar bu taslamalaryň durmuşa geçirilmeginiň energetika pudagynda ikitaraplaýyn hyzmatdaşlygy çaltlaşdyrjakdygyny bellediler.
Taraplaryň ikisi-de energiýa tygşytlylygy, gaýtadan dikeldilýän energiýa çeşmeleri, wodorod, ammiak, elektrik ýangyjy, uglerody tutmak, ulanmak we saklamak, metanyň syzmagyna garşy çäreler, elektrik energiýasyny öndürmegiň ýokary netijeli tehnologiýalary ýaly ugurlar boýunça hyzmatdaşlygy ösdürmek barada ylalaşdylar.
Ähtnamada uglerod bitaraplygyny gazanmak boýunça ýol kartasynyň işlenip düzülmegine goldaw bermek barada aýdylýar. Mundan başga-da, 2018-nji ýylda gol çekilen we 2019-njy ýylda täzelenen iki ýurduň infrastruktura pudagyndaky hyzmatdaşlygy barada özara düşünişmek hakyndaky Ähtnama birleşdiriler.
