Italiýanyň Superkubogynyň final oýnunda "Inter" bilen "Napoli" duşuşar. Naýbaşy kubok ugrunda ýaryşlar Saud Arabystanynda geçirilýär.
19-njy ýanwarda "Inter" ýarym final duşuşygynda "Lasiodan" 3:0 hasabynda üstün çykdy. Duşuşykda gollary Markus Týuram (17-nji minut), Hakan Çalhanoglu (49, pen.) we Dawide Frattezi (87) geçirdi.
Öňküsi gün, "Napoli" 3:0 hasabynda "Fiorentinany" ýeňip, birinji finalçy boldy.
Final duşuşygy 22-nji ýanwarda geçiriler.
Ýaryş "Dörtleriň finaly" tertibinde geçirilýär. 2022/23 möwsümiň jemleri boýunça "Napoli" Italiýanyň çempiony boldy, "Inter" ýurduň Kubogyny gazandy, "Lasio" çempionatda ikinji ýeri eýeledi, "Fiorentina" bolsa Kubokda finala çykdy.
Superkubogyň häzirki çempiony "Interdir". Onuň hasabynda 7 sany Superkubok bar. Bu görkeziji babatda liderlik "Ýuwentusa" degişli (9).
