Işläp düzüjiler üçin geçirilen tanyşdyryş dabarasynda Huawei kompaniýasy Android programmalarynyň işlemegini goldamaýan HarmonyOS Next operasiýa ulgamyny hödürledi. IXBT.com-yň habaryna görä, hytaý ägirdi öz ýoly bilen gidip, Google Android we Apple iOS bilen güýçli bäsdeşlige girmek kararyna geldi.
Täze platformanyň täjirçilik taýdan işe girizilmegi 2024-nji ýylyň dördünji çärýegine meýilleşdirilýär.
Diňe ykjam programma üpjünçiligini ösdürmek hytaý ägirdi üçin ýeterlik däl – ol tutuş ekoulgamy gurmagy maksat edinýär. HarmonyOS Next programma dükanynda eýýäm 200-e golaý programma bar, ýöne ýylyň ahyryna çenli kompaniýa olaryň sanyny 5 müňe, geljekde bolsa olaryň sanyny 500 müňe çenli köpeltmegi meýilleşdirýär. Munuň üçin kompaniýa döredijiler bilen hyzmatdaşlyk edýär, SDK, resminamalar we okuw materiallaryny çykarýar. Gürrüň düýbünden täze tehnologiýa jemgyýetini döretmek barada gidýär.
Huawei bu işe ep-esli maýa goýýar: kompaniýa, öz programmalaryny döretmekden başlap, ösüş gurallaryna çenli innowasiýany höweslendirmek üçin 7 milliard ýuan (970 million dollar) bölüp berdi. Kompaniýa diňe bir geljegi uly tehnologiýalara däl, eýsem 300-den gowrak bilim edaralary bilen hyzmatdaşlygyň üsti bilen işläp düzüjileriň täze neslini ösdürip ýetişdirmäge hem maýa goýýar.
