17 ýyl ozal, 2007-nji ýylyň 9-njy ýanwarynda önümçilikde özgerişlik döreden we «Apple-i» dünýäniň iň baý kompaniýalarynyň birine öwüren ilkinji nesil «iPhone» smartfony tanyşdyryldy.
San-Fransisko şäherinde (Kaliforniýa ştaty) geçirilen «Macworld Conference & Expo» atly maslahatda «rewolýusion ykjam telefon» we «öňdebaryjy internet-kommunikatory» görkezildi. «Apple» kompaniýasynyň şol wagtky baş direktory Stiw Jobs çykyşyny «bu pursata iki ýarym ýyl bäri sabyrsyzlyk bilen garaşandygy» we indi «Apple-iň» «telefony täzeden oýlap tapmagy meýilleşdirýändigi» hakyndaky sözler bilen başlady.
Ilkinji «iPhone-yň» satuwy şol ýylyň iýun aýynyň ahyrynda ABŞ-da başlandy we uly tolgunma döretdi. Satuwa çykarylmagyndan birnäçe gün öň «Apple» dükanlarynyň öňünde uzyn nobatlar döredi we satuw başlanandan birnäçe sagatdan soň köp ýerlerde smartfonlar gutardy.
Enjama uly gyzyklanma bildirilmegine garaşan Kupertino şäherindäki kompaniýa adaty bolmadyk ädimleri ätmäge mejbur boldy. «Apple» esasy işinden boş wagtlarynda dükanlarda ogurlygynyň öňüni almak üçin goşmaça töleg töläp, polisiýa işgärlerini işe aldy. Bu ýagdaýda amerikalylar «PlayStation 3» çykandan soň köpçülikleýin ogurlyklara we hatda atyşyk bilen baglanyşykly bidüzgünçiliklere sezewar bolan Ýaponiýanyň «Sony» kompaniýasynyň tejribesini göz öňünde tutdular.
«Apple-iň» ilkinji telefony derrew meşhurlyk gazandy: satuw başlanandan birnäçe aýyň içinde «Apple» dünýäde takmynan 1,4 million enjam satdy. «Time» žurnaly ajaýyp dizaýny, ykjamlygy we interfeýsi üçin «iPhone-ny» «2007-nji ýylyň iň uly oýlap tapyşy» diýip atlandyrdy, şeýle hem munuň «Apple» kompaniýasynyň özi üçin hem, onuň bäsdeşleri üçin hem enjamlaryň indiki neslini mundan beýläk-de ösdürmäge güýçli itergi berjekdigini öňe sürdi.