Özbegistan yzly-yzyna ikinji aý bäri dünýäde iň köp altyn satýan ýurt boldy. Bütindünýä altyn geňeşiniň (World Gold Council) maglumatlary muny subut edýär.
Noýabr aýynda merkezi banklar tarapyndan gymmat bahaly metallary satyn almagyň sap mukdarynyň 44 tonna ýetendigi bellenilýär. Satyn almagyň umumy mukdary 60 tonna deň bolup, bu oktýabr aýynyň görkezijileri bilen deňeşdirilende, 4% azdyr. Şeýle-de bolsa, bu geçen ýylda 36 tonna bolan ortaça görkezijiden has köpdür.
Noýabr aýynda altyny import ediji esasy ýurt Türkiýe Respublikasy boldy. Ol 25 tonna gymmat bahaly metal satyn aldy. 19 tonna bilen Polşa ikinji orunda ýerleşdi. Şeýle hem ilkinji bäşlige Hytaý (12 tonna), Çehiýa (3 tonna) we Gyrgyzystan (1 tonna) girdi.
Özbegistan noýabr aýynda 11 tonna altyn satmagy başardy, bu bolsa onuň yzýanyndaky Gazagystandan dört esse köpdür.
2023-nji ýylyň jemleri boýunça Özbegistan gymmat bahaly metallaryň satuwynyň sap mukdary boýunça Gazagystandan az-kem yza galyp, ikinji ýeri eýeledi. Satyn almagyň sap mukdary boýunça sanawda Hytaý Halk Respublikasy birinji orunda durýar, ondan yzky hatarlarda bolsa Polşa we Singapur ýerleşdi.
