«Euronews» web sahypasynda «Däp-dessurlar we baýramçylyklar arkaly medeni syýahat» atly Türkmenistana bagyşlanan makala peýda boldy. Makalanyň awtorlary ýewropaly okyjylara türkmen halkynyň baý milli mirasy, dürli däp-dessurlary we senetleri barada gürrüň berdiler.
Makalada şaý-sepleriň we milli lybaslaryň, şol sanda toý lybaslarynyň gözelligine hem-de özboluşlylygyna aýratyn üns berilýär, şeýle hem keşdeleriň we nyşanlaryň manysy düşündirilýär.
Ýazyjylar küştdepdi tansyny «köp duýguly tejribe» diýip atlandyrdylar we bu ajaýyp joşgunly tansyň ussat ýerine ýetirilişiniň tansçylary hem-de tomaşaçylary özboluşly trans ýagdaýyna düşürýändigini bellediler.
Makalada dutar mowzugyna hem aýratyn üns çekilip, gadymy eposlary we rowaýatlary gorap saklamakda möhüm wezipäni ýerine ýetiren bu gadymy saz guralynyň ähmiýetini belläp geçdiler.
Türkmen halkynyň milli mirasynyň ÝUNESKO-nyň Maddy däl medeni mirasynyň sanawyna girizilmegi hem olaryň ählumumy gymmatyny tassyklaýar.
