Microsoft maglumatlary işleýiş merkeziniň täze şahamçasynyň gurluşygy üçin Wiskonsin ştatynda ýer bölegini satyn alýar.
Milwaukee Business Journal neşiriniň maglumatlaryna görä, kompaniýanyň satyn alan ýeri, takmynan, 76 mln dollara Kreýsiger maşgalasyndan satyn alnan 165 gektar ýer bölegidir.
Kreýsiger maşgalasy bu ýeri oba hojalyk işlerini alyp barmak üçin ulanypdyr hem-de ol ýerde Land of the Giants Pumpkin Farm kädi fermasyny dolandyrypdyr. Emlägiň öz bahasy 600 müň dollardan hem az. Şertnamanyň bahasy ýerli hökümet tarapyndan iPhone Foxconn öndürijisi bilen baglaşylan şertnamanyň çäklerinde 2017-nji ýylda Kreýsiger maşgalasyna teklip edilen mukdardan üç esseden hem gowrak boldy. Şol wagt maşgala ýer bölegini satmaga garşy bolmasa-da, onuň üçin has ýokary baha almak isleýärdi.
Şol bir wagtyň özünde, Microsoft ýerli etrap we şäher häkimlikleri bilen ýerden peýdalanmak barada şertnama baglaşdy we öz maglumat merkezlerini gurmak üçin ýene, takmynan, 5 km2 ýer satyn aldy.
Neşiriň maglumatlaryna görä, gurluşygyň birinji tapgyry eýýäm alnyp barylýar, onuň üçin, takmynan, 1 mlrd dollar sarp ediler. Kompaniýa birinji tapgyrda 200 iş ornunyň döredilmegine garaşýar, ýöne geljekde ýene 460 iş orny goşulyp bilner.
