Aşgabatda geçirilen Kuraş boýunça dünýä çempionaty göreşiň bu görnüşiniň Halkara federasiýasy (IKA) tarapyndan dünýä çempionatlarynyň taryhynda iň gowy ýaryş diýlip ykrar edildi. Bu barada “Türkmenistan: Altyn asyr” habar berýär.
“23-nji noýabrdan 28-nji noýabr aralygynda Aşgabatda geçirilen Kuraş boýunça XIV dünýä çempionaty göreşiň bu görnüşi boýunça dünýä birinjilikleriniň taryhynda iň gowy ýaryşlaryň biri boldy. Türkmenistanyň hökümeti ýaryşy ýokary dereje gurnamak we geçirmek üçin uly tagallalary etdi” – diýlip, IKA-nyň habarynda aýdylýar.
Ýatlap geçsek, Kuraş boýunça dünýä çempionatynda dört yklymyň 45 ýurdundan 181 türgen 15 medal toplumy ugrunda göreşdi. Ýaryşyň dowam edýän günleri geçirilen IKA kongresine bolsa Aziýadan, Afrikadan, Ýewropadan, Günorta hem Demirgazyk Amerikadan 53 döwletiň wekilleri gatnaşdy.
Ýaryşda ýurdumyzyň türgenleri 15 agram derejesinde 15 medala – 5 altyn, 6 kümüş we 4 bürünç medala mynasyp boldular. Medallaryň umumy sany boýunça pälwanlarymyz topar sanawynda diňe Özbegistanyň ýygyndysyndan yza galdy. Bu ýurduň türgenleriniň hasabynda 7 altyn, 1 kümüş we 1 bürünç medal bar. Liderleriň üçlügini bir altyn, iki kümüş we üç bürünç medal bilen Gazagystanyň ýygyndysy jemledi.
