Geljek ýyl Apple üçin möhüm ýyl bolar, sebäbi kompaniýa 2015-nji ýyldan bäri ilkinji gezek täze önüm hataryny işe girizmegi wada berýär. Şonuň bilen birlikde kompaniýa garaşylýan birnäçe gurluşy hödürlär. Bular barada MacRumors neşiri gürrüň berýär diýip, gazeta.ru belleýär.
Ilkinji nobatda neşir AirPods gurluşlaryny belledi. 2024-nji ýylda Apple kompaniýasy AirPods 4-üň iki wersiýasyny hödürlär: gymmat we arzan. Olaryň ikisi-de täzelenen dizaýne eýe bolar, ýöne diňe gymmat model işjeň galmagal basyş ulgamy bilen üpjün ediler.
Geljek ýyl IT ägirdi köp sanly täze iPad gurluşyny hödürlär, ýöne neşir ilkinji OLED ekranly Pro wersiýanyň çykmagyna sabyrsyzlyk bilen garaşýar. OLED ekranlar diňe bir şekili ýokary hilli etmän, eýsem iPad-yň has inçe bolmagyna mümkinçilik berer. Şonuň üçin gurluşyň dizaýnynyň hem üýtgemegine garaşylýar.
2024-nji ýyl Apple Watch üçin şanly ýyl bolar. Şu mynasybetli kompaniýa täze dizaýna we kemerjikler üçin täze berkidişe eýe boljak Apple Watch X sagadyny hödürläp biler. Gurluşyň esasy aýratynlygy adam bedenindäki gan basyşyny ölçemek mümkinçiligi bolar.
iPhone 16 hatary hem garaşylýan täzelikdir. Gurluş düýpli üýtgeşmelere sezewar bolmasa-da, žurnalistler täzeden işlenen kamera bloguna, Pro wersiýalarda ulaldylan ekrana, şeýle-de täze prosessorlara garaşýarlar.
2024-nji ýylyň iň gyzykly önümi Apple Vision Pro garniturasy bolar. Vision Pro geljegi uly gurluş ýaly bolup görünse-de, onuň ilkinji synlary gowşak boldy. Şundan ugur alyp, neşir ilkinji nesil Vision Pro-nyň üstünliklerine şübheli garaýar. Şeýle-de bolsa, žurnalistler satuwyň gowşakdygyna garamazdan, Apple-iň “baş kompýuterleriniň” hataryny ösdürmegi dowam etdirjekdigine ynanýarlar.
