BMG-niň Baş Assambleýasy Gazagystanyň başlangyjy bilen 2026-njy ýyly Halkara meýletinçiler ýyly diýip yglan etdi. Bu başlangyjy Gazagystan Respublikasynyň prezidenti Kasym-Žomart Tokaýew BMG-niň münberinden 2020-nji ýylda öňe sürdi diýip, kz.kursiv.media belleýär.
Gazagystandan başga-da, Halkara meýletinçiler ýylyny yglan etmek barada rezolýusiýany Ermenistan, Boliwiýa, Germaniýa we Keniýa teklip etdi. Bu resminamanyň awtorlary bolup BMG agza döwletleriň 54-üsi çykyş etdi.
“Halkara ýylynyň çäklerinde geçirilýän çäreler milli, sebit we dünýä derejesinde meýletinçiler hereketine uly itergi berer, meýletinlik ugrundaky halkara hyzmatdaşlygy mundan beýläk-de pugtalandyrmaga we onuň geljekki ösüşiniň esasy ugurlaryny kesgitlemäge ýardam berer” – diýip, Gazagystan Respublikasynyň Daşary işler ministrliginiň metbugat gullugynda bellenildi.
Gazagystanyň prezidentiniň belleýşi ýaly, meýletinçiler ahlak gymmatlyklaryny ähli zatdan ileri tutýarlar we döwlet bilen jemgyýetiň arasynda ygtybarly hzymatdaşlygy berkitmekde möhüm rol oýnaýarlar.
Ýatlap geçsek, 2023-nji ýylyň 20-21-nji iýulynda Astanada Gazagystanyň prezidentiniň, BMG-niň ýokary wezipeli wekilleriniň hem-de 30-dan gowrak ýurtdan meýletinçileriň gatnaşmagynda Halkara meýletinçiler forumy geçirildi.
