Indiki nesliň Apple Watch-y Micro LED görnüşli ulaldylan ekrana eýe bolar. Bu barada TrendForce analitik firmasynyň täze hasabatynda kompaniýanyň gözlegler boýunça uly wise-prezidenti Erik Çiu aýtdy diýip, gazeta.ru habar berýär.
Ol 2026-njy ýylyň Apple sagatlarynyň panelinde täze görnüşli yşyk diodlarynyň – Micro LED-iň ulanyljakdygyny habar berdi. Şeýle-de, onuň çaklamasyna görä, matrisanyň ölçegi häzirki Apple Watch Ultra sagatlaryndan, takmynan, 10% uly bolar. Ýagny, täze sagatlaryň diagonaly 2,12 dýuým töweregi bolar.
Apple-iň Micro LED ekranlaryny iki esasy üpjün edijisi bolar: ams OSRAM nemes kompaniýasy we LG Display. Ams OSRAM 10x10 mkm ölçegli mikro-yşyk diodly çipleriň önümçiligi bilen meşgullanar. Öz gezeginde, LG Display ekranlar üçin goşmaça komponentleriň çykmagyna jogapkär bolar.
Çiunyň aýtmagyna görä, Micro LED-e geçmek Apple-iň sagat displeýleri üçin çykdajylaryny ep-esli azaldar. 2026-njy ýylda bir matrisanyň kompaniýa, takmynan, 120 dollara düşmegine garaşylýar, bu OLED paneliniň häzirki bahasyndan 2,5-3 esse arzandyr.
