Garaşsyz Döwletleriň Arkalaşygynyň hökümet baştutanlarynyň Geňeşiniň mejlisi GDA gatnaşyjy döwletleriň ykdysadyýet we medeniýet ministrleriniň gatnaşmagynda 18-nji dekabrda Moskwada Gyrgyzystan Respublikasynyň baştutanlygynda geçiriler.
Duşuşykda Arkalaşygyň çäklerinde medeni-ynsanperwer gatnaşyklary giňeltmek meselesine aýratyn üns berler. Bu barada Russiýanyň hökümetiniň metbugat gullugy habar berýär.
Mejlisiň ahyrynda GDA gatnaşyjy döwletleriň hökümet baştutanlarynyň medeni hyzmatdaşlygyň geljegi barada beýannamasyny kabul etmek meýilleşdirilýär. Bu resminamada medeni dialogy çuňlaşdyrmak, Arkalaşygyň ýurtlarynyň medeni köpdürlüliligine özara düşünişmegi we özara hormaty güýçlendirmek, GDA gatnaşyjy döwletleriň halklarynyň medeni-siwilizasiýa dürlüligini ýaýratmak boýunça bilelikdäki işleriň esasy ugurlary kesgitlener.
20-nji dekabrda Moskwada GDA-nyň Ykdysady geňeşiniň ýanyndaky Ykdysady meseleler boýunça komissiýanyň mejlisi geçiriler.
