Pittsburg uniwersitetiniň we Waşington ştatynyň uniwersitetiniň alymlary ykjam wideo oýunlarynyň çagalara sanjym gorkusyny ýeňip geçmäge kömek edip biljekdigini anykladylar.
Maglumatlara görä, 4-6 ýaş aralygyndaky çagalaryň takmynan 19%-i şprislerden we sanjymlardan gorkýarlar. Bu gorkyny ýeňip geçmek maksady bilen, alymlar ykjam enjamlar üçin niýetlenen «Dr.Zoo» atly 3D başdan geçirme oýnuny döretdiler. Onda oýunçy weterinar hökmünde dürli haýwanlary gözlemeli we olara sanjym etmeli hem-de beýleki wezipeleri ýerine ýetirmeli.
Synaga 3-6 ýaş aralygyndaky 36 çaga gatnaşdy. Olaryň hemmesi sanjymdan gorkýardylar. Meýilleşdirilen sanjymdan iki hepde öň, ýaş gatnaşyjylardan «Dr.Zoo» oýnuny oýnamak we dört tapgyryň hemmesini tamamlamak haýyş edildi.
Her oýun gününden soň, ene-atalar Çagalaryň gorky şkalasy arkaly çagalarynyň gorky derejesine baha berdiler. Sajymlardan soň alymlar oýnuň täsiri barada pikirleri we ony mundan beýläk-de ösdürmek baradaky teklipleri almak üçin ene-atalar bilen 10-30 minutlyk söhbetdeşlik geçirdiler.
Netijede, synaga gatnaşandan soň, 36 çaganyň 26-synyň ene-atasy çagasynyň geçmişdäki tejribeler bilen deňeşdirilende, sanjymdan gorkmagynyň ep-esli azalandygyny aýtdylar. Şeýle hem sanjym wagtynda çagalarda stresiň azalandygyny bellediler.
