11-nji dekabrda geçirilen giňişleýin Hökümet mejlisiniň dowamynda Prezident Serdar Berdimuhamedow diplomatik gullugyň işgärlerini wezipä bellemek we wezipeden boşatmak bilen bagly meselä seretdi.
Prezident Serdar Berdimuhamedow A.Haljanowy, başga işe geçmegi sebäpli, Birleşen Milletler Guramasynyň Ženewadaky edarasynyň ýanyndaky Türkmenistanyň Hemişelik wekili, Türkmenistanyň Şweýsariýa Konfederasiýasyndaky Adatdan daşary we Doly ygtyýarly ilçisi wezipelerinden boşatdy.
Döwlet Baştutany W.Hajiýewi daşary işler ministriniň orunbasary wezipesinden boşadyp, ony Birleşen Milletler Guramasynyň Ženewadaky edarasynyň ýanyndaky Türkmenistanyň Hemişelik wekili hem-de Türkmenistanyň Şweýsariýa Konfederasiýasyndaky Adatdan daşary we Doly ygtyýarly ilçisi wezipelerine belledi.
A.Gurbanow Türkmenistanyň Eýran Yslam Respublikasyndaky Adatdan daşary we Doly ygtyýarly ilçisi wezipesinden boşadylyp, ol daşary işler ministriniň orunbasary wezipesine bellenildi.
Serdar Berdimuhamedow B.Mätiýewi, başga işe geçmegi sebäpli, daşary işler ministriniň orunbasary wezipesinden boşatdy.
Şonuň ýaly-da, Türkmenistanyň Prezidentiniň Diwanynyň Döwlet protokoly we halkara gatnaşyklary bölüminiň müdiri S.Muhammetdurdyýew şol bir wagtda Türkmenistanyň daşary işler ministriniň orunbasary wezipesine bellenildi.
Türkmenistanyň Hindistandaky ilçisi Şalar Geldinazarow şol bir wagtda Şri-Lanka Demokratik Sosial Respublikasyndaky ilçisi wezipesini ýerine ýetirer.
