17 ýaşa çenli oýunçylaryň arasynda futbol boýunça dünýä çempionatynyň final duşuşygynda Germaniýanyň milli ýygyndysy Fransiýanyň milli ýygyndysyndan üstün çykdy. Ýaryş Indoneziýada geçirildi.
Duşuşygyň esasy wagty 2:2 hasabynda tamamlandy. Germaniýanyň milli ýygyndysy 2:0 hasabynda öňe saýlansa-da, fransuzlar hasaby deňlemegi başardylar. Penalti urgulary tapgyrynda nemesler garşydaşlaryndan has üstün geldiler – 4:3.
Bäsleşigiň bürünç medalynyň eýesi Maliniň milli ýygyndysy boldy. Üçünji ýer ugrundaky oýunda malililer Argentinyň milli ýygyndysyny ýeňmegi başardylar (3:0).
Ýetginjekleriň arasyndaky dünýä çempionatyna 24 topar gatnaşdy. Soňky gezek 2019-njy ýylda Braziliýanyň topary bu ýaryşda ýeňiji bolupdy. Germaniýanyň milli ýygyndysy bu ýaryşda ilkinji gezek ýeňiji boldy.
