«Financial Times» (FT) britan gazeti 2023-nji ýylyň iň görnükli 25 zenanynyň sanawyny çap etdi. Oňa amerikaly aktrisa Margo Robbi, aýdymçy Beýonse we Ýewropa Komissiýasynyň başlygy Ursula fon der Lýaýen girdi.
Neşiriň belleýşi ýaly, bu ýörite taslama birnäçe aýyň dowamynda onlarça býurodan FT-niň ýüzlerçe žurnalistleri, okyjylary we pudak ýolbaşçylary bilen maslahatlaşyp döredildi. Netijede, abraýly baýraklara eýe bolan zenanlaryň sanawy düzüldi, ýöne hatda «Nobel» we «Pulitser» baýraklary, «Gremmi» we dünýä kuboklary hem olaryň işleriniň köptaraply häsiýetini doly şöhlelendirip bilmeýär diýip, «Financial Times» belleýär.
Bu sanawda Ukrainanyň Prezidentiniň aýaly Ýelena Zelenskaýa, eýranly adam hukuklaryny goraýjy Narges Mohammadi, BMG-niň Biologik dürlülik baradaky konwensiýasynyň ýerine ýetiriji sekretary Elizabet Maruma Mrema, Braziliýanyň daşky gurşawy goramak ministri Marina Silwa we Şweýsariýanyň Federal Geňeşiniň agzasy Karin Keller-Satter orun aldylar.
Şeýle hem oňa Günorta Koreýanyň aýdym-saz topary «aespa», ýazyjy Lola Şonein, «OpenAI» kompaniýasynyň tehniki direktory Mira Murati we beýleki zenanlar girizildi.
