Türkmenistanyň taryhy we medeni ýadygärliklerinde geçirilen ylmy barlaglaryň dowamynda soňky ýyllarda toplanan ylmy maglumatlary dünýäniň ylmy jemgyýetçiligine giňden tanatmak maksady bilen, «Asyrlaryň yzlary» atly halkara ylmy ýygyndy neşir ediler. Bu barada wise-premýer M.Mämmedowa Hökümet mejlisiniň barşynda habar berdi.
Türkmenistanyň taryhy we medeni ýadygärlikleri goramak, öwrenmek hem-de rejelemek baradaky milli müdirliginiň garamagyndaky taryhy-medeni döwlet goraghanalarynyň öz serişdeleriniň hasabyna «Asyrlaryň yzlary» atly halkara ylmy ýygyndyny türkmen, iňlis we rus dillerinde neşir etmek göz öňünde tutulýar.
Bellenilişi ýaly, häzirki wagtda degişli düzümler hereket edýän ylalaşyklaryň esasynda daşary ýurtlaryň tanymal ylmy merkezleri bilen ýurdumyzyň taryhy-medeni ýadygärliklerini düýpli öwrenmek we geljekki nesillerimize ýetirmek ugrunda ýakyndan hyzmatdaşlyk edýärler.
Bu täze neşir giň okyjylar köpçüligi, şol sanda daşary ýurtly okyjylar üçin niýetlenilýär. Şunuň bilen birlikde, bu neşiri Aziýanyň, Ýewropanyň we Amerikanyň iri ylmy merkezleriniň kitaphanalaryna ibermek, şeýle hem onuň elektron görnüşini internet arkaly okyjylara elýeterli etmek meýilleşdirilýär.
Täze neşiriň redaksion geňeşiniň düzümine türkmen alymlary we bilermenleri bilen bir hatarda, Fransiýanyň, Italiýanyň, Beýik Britaniýanyň we Russiýanyň meşhur bilermenleriniň we alymlarynyň goşulandygy barada aýdyldy.
