Ronaldunyň oýnamakdan ýüz öwürmegi saud Pro-ligasyna $2,4 mlrd ýitgi getirdi

Saud Arabystanynyň Pro-ligasy özüniň okgunly ösüş döwründe iň agyr zarba bilen ýüzbe-ýüz boldy we bu wakanyň merkezinde Kriştianu Ronaldu durýar.
Speedline portalynyň habar bermegine görä, amerikan teleýaýlymy FOX Sports liga bilen hyzmatdaşlygyny bes etdi. Bu taslamadan çykan ilkinji iri halkara ýaýlym guramasy boldy. Şeýle ädimiň netijeleri hem uly boldy: çeşmäniň hasabyna görä, daşary ýurt tele-hukuklaryndan we marketingden gelýän girdejileriň azalmagy sebäpli ýitgi eýýäm 2,4 milliard dollara ýetdi.
Bu waka «Al-Nasr» toparynyň hüjümçisi bilen bagly dawanyň uzaga çekmegi sebäpli bolup geçdi. Ronaldu toparynyň soňky iki duşuşygynda meýdança çykmady, hatda oýunçylaryň sanawyna-da goşulmady. Muňa garamazdan, «Al-Nasr» olaryň ikisinde-de ýeňiş gazanmagy başardy: ilki 2-nji fewralda «Al-Riýaddan» (1:0), soňra bolsa 6-njy fewralda «Al-Ittihaddan» (2:0) üstün çykdylar. Emma klubuň janköýerleri meýdançada öz kapitanyna garaşýandyklaryny mälim etdiler.

ESPN-iň we Portugaliýanyň A Bola neşiriniň maglumatlaryna görä, 41 ýaşly hüjümçi toparyň transfer syýasatyndan närazydygy we Saud Arabystanynyň Döwlet maýa goýum gaznasy tarapyndan toparyň ýolbaşçylygyndaky üýtgeşmeler boýunça kepillikleriň ýokdugy sebäpli oýunlara gatnaşmakdan ýüz öwürýär.
Speedline bu ýagdaýyň bir klubuň ýa-da bir oýunçynyň çäginden çykýandygyny belleýär: dawanyň ösüşine ýurduň daşynda hem ünsli syn edilýär, onuň netijeleri bolsa gönüden-göni tutuş liganyň halkara abraýyna täsir edip biler.
Ronaldu 2023-nji ýylyň ýanwaryndan bäri Er-Riýadyň «Al-Nasr» toparynda çykyş edýär. Şu möwsümde ol 22 oýna gatnaşyp, 18 gol geçirdi we üç assist etdi.
Ýakyn wagtda «Al-Nasr» Aşgabatda myhmançylykda oýnar. 11-nji fewralda klub AFK-nyň Çempionlar ligasy 2-niň 1/8 finalynyň çäginde Türkmenistanyň çempiony «Arkadag» topary bilen duşuşar. Toparlaryň arasyndaky jogap duşuşygy 18-nji fewralda Er-Riýadda geçiriler.