ByteDance öz Nuverse oýun bölümini ýapmagy meýilleşdirýär. Bu barada Reuters agentligine salgylanyp, kommersant.ru habar berýär.
Kompaniýada bu habar tasssyklandy, ýöne proses barada jikme-jik maglumat bermekden boýun gaçyrdylar.
“Biz işimizi yzygiderli seljerýäris we uzak möhletleýin strategiki ösüş ugurlaryna ünsi jemlemek üçin düzedişleri girizýäris. Ýakynda geçirilen seljermeden soň biz oýun işimizi üýtgedip gurmak barada kyn karara geldik” – diýip, kompaniýanyň wekili aýtdy.
Maglumatlara görä, kompaniýa öz çözgüdi barada ýakyn günlerde işgärlerine habar berer, şol bir wagtyň özünde käbir işgärler bu barada eýýäm habarly. Kompaniýa heniz çykarylmadyk ähli oýun önümlerini işläp düzmegi bes etmekçi bolýar. Bazarda eýýäm bar bolan oýunlar bolsa başga bir oýun çykaryjylara geçiriler. Bu çözgüt diňe TikTok-da we onuň Douyin hytaý wersiýasynda işe goýberilen kazual oýunlara degişli bolmaz.
Nuverse 2019-njy ýylda döredildi. 2021-nji ýylda ByteDance işinde üýtgetmeleri geçirdi we Nuverse kompaniýanyň esasy alty bölümçesiniň birine öwrüldi. Şeýle-de bolsa, häzire çenli ByteDance-iň hakykatdanam üstünlikli ýekeje oýny-da peýda bolmady.
