Irlandiýaly ýazyjy Pol Linç “Pygamberiň aýdymy” (Prophet Song) romany üçin 2023-nji ýylyň edebiýat boýunça Buker baýragynyň eýesi boldy. Bu barada baýragyň gowşurylyş dabarasyndan TASS-yň habarçysy habar berýär. Dabara London Sitisindäki “Old-billingsgeýt” konsert-dynç alyş toplumynda geçirildi.
Linçiň biografiýasynda bäşinji bolan bu antiutopik roman Irlandiýada zalymlygyň ýüze çykan döwri Dublinde ýaşaýan mikrobiolog Eýliş Stak barada gürrüň berýär. Sýužet boýunça gözlegçi gizlin polisiýa tarapyndan närazylyklara gatnaşandygy üçin onuň adamsy, profsoýuz aktiwisti Larri tussag edilenden soň dört çagany özbaşdak terbiýelemeli bolýar.
Buker baýragynyň emin agzalarynyň başlygy, kanadaly ýazyjy Esi Edujanyň belleýşi ýaly, roman “bir aýalyň awtoritar dolandyryşa tarap barha çalt gaýdýan antiutopik Irlandiýada öz maşgalasyny halas etmek synanyşyklaryna bagyşlanýar. “Bu ençeme wagtlap ýatdan çykmajak haýran galdyryjy roman. Okgunly we rehimsiz, ol lenç edilen nusgalardan gaça durýar. Bu döredijiliginiň iň ýokary derejesine ýeten awtoryň örän batyrgaý we täsirli eseri” – diýip, ol belleýär.
Buker baýragy iňlis edebiýatynyň dünýäsinde iň abraýly baýraklaryň biridir. Ol 1968-nji ýylda döredildi, ýöne 1969-njy ýyldan bäri berilýär.
