22-23-nji noýabrda Londonda Türkmenistanyň maýa goýum forumy geçirildi we oňa türkmen ykdysadyýetiniň dürli pudaklary boýunça köp sanly jogapkär adamlar gatnaşdy. Resmi wekiliýete hökümet wekillerinden başga-da, döwlete degişli däl kompaniýalaryň we guramalaryň ýolbaşçylary hem girdi. Foruma gatnaşýan ikinji tarap Türkmenistan bilen hyzmatdaşlykda tejribesi bolan hem-de şeýle gatnaşygy ýola goýmagyň ýollaryny gözleýän onlarça Ýewropa kompaniýalarynyň top-menejerlerinden ybarat boldy diýip, Orient habar berýär.
Forumyň iki iş gününiň dowamynda tanyşdyryşlar, tematiki sessiýalar we ikitaraplaýyn gepleşikler geçirildi. Türkmenistanyň Söwda-senagat edarasynyň başlygy Mergen Gurdow öz çykyşynda Türkmenistanda üstünlikli durmuşa geçirilen uly göwrümli maýa goýum taslamalary barada aýdyp, Gyýanlydaky polimer zawodyny ($3,4 mlrd), Ahaldaky gazhimiýa toplumyny ($1,7 mlrd), şeýle-de dokma toplumlaryny, täze elektrik stansiýalary we ş.m. belläp geçdi.
Şeýle-de, sebitleri we önümçilik kuwwatyny ösdürmäge innowasion çemeleşmäniň mysaly hökmünde ikinji tapgyr gurluşygy başlanan Arkadag şäheri bellenildi. Onuň bu tapgyry 10 müňden gowrak iş orny bolan senagat toparyny döretmegi göz öňünde tutýar. Daşary ýurt kompaniýalaryny bu taslama gatnaşmaga çagyrmak bilen, Gurdow maýadarlary gyzyklandyryp biljek beýleki meýilnamalar barada gysgaça gürrüň berdi.
Mergen Gurdow soňky ýyllarda ýurdumyzyň mineral dökünleri çykarmak boýunça önümçilik kuwwatynyň üç esseden gowrak ýokarlanandygyny belledi. Bu taslamalary durmuşa geçirmekde Ýaponiýadan, ABŞ-dan we Ýewropa Bileleşiginden dünýä belli kompaniýalar hyzmatdaş boldular.
“Türkmenhimiýa” döwlet konserni birnäçe täze geljegi uly maýa goýum taslamalaryny durmuşa geçirmegi meýilleşdirýär. Himiýa pudagynda hususy pudakda hem onlarça maýa goýum taslamasy işlenip düzülýär.
Telewizorlaryň, elektron töleg terminallarynyň, kompýuterleriň, noutbuklaryň, planşetleriň we beýleki elektron gurluşlaryň önümçiligini giňeltmek meýilleşdirilýär.
Şu maksat bilen Mergen Gurdow işewür toparlary we kompaniýalaryň wekillerini Türkmenistanda gurnalýan sergilere we ýarmarkalara gatnaşmaga, şeýle-de özara bähbitli hyzmatdaşlygyň mümkinçilikleri bilen has içgin tanyşmak üçin ýörite iş saparlary bilen ýurda gelmäge çagyrdy.
