17-nji noýabrda Prezident Serdar Berdimuhamedow Eýran Yslam Respublikasynyň Ýol we şäher gurluşyk ministri Mehrdad Bazrpaşy kabul etdi.
Serdar Berdimuhamedow Aşgabatda geçirilýän «Iran Prože» atly ýöriteleşdirilen serginiň we işewürler maslahatynyň ähmiýeti barada aýdyp, bu çäreleriň iki ýurduň söwda-ykdysady mümkinçiliklerini durmuşa geçirmäge ýardam etjekdigini nygtady. Şunuň bilen baglylykda, EYR-niň wekiliýetiniň saparynyň netijeleriniň özara bähbitli hyzmatdaşlygy has-da işjeňleşdirmäge we täze mazmun bilen baýlaşdyrmaga goşant goşjakdygyna ynam bildirildi.
Ýurtlarymyzyň arasyndaky hyzmatdaşlygy ösdürmegiň geljegini ara alyp maslahatlaşmagyň barşynda döwlet Baştutanymyz we EYR-niň ýol we şäher gurluşyk ministri söwda-ykdysady gatnaşyklaryň döwletara gün tertibinde aýratyn orun eýeleýändigini nygtadylar. Bellenilişi ýaly, Eýran Türkmenistanyň daşary söwda dolanyşygynda möhüm orny eýeleýär.
Ýangyç-energetika toplumy, ulag-kommunikasiýa, gurluşyk ulgamlary, oba hojalygy özara gatnaşyklaryň esasy ugurlarynyň hatarynda görkezildi. Şunuň bilen birlikde, hususy ulgamyň wekilleriniň arasyndaky gatnaşyklaryň has-da işjeňleşýändigi bellenildi.
