Türkmenistanyň Prezidenti Serdar Berdimuhamedow Türkmenistanyň edermen oba zähmetkeşlerini, hasyl ussatlaryny we ähli halkyny Hasyl toýy bilen gutlady.
«Daýhanlarymyzyň çekýän yhlasly, tutanýerli zähmeti netijesinde sahawatly türkmen topragynda oba hojalyk ekinleriniň bol hasyly ösdürilip ýetişdirilýär, azyk howpsuzlygy üpjün edilýär. Garaşsyz ýurdumyzyň ähli ugurlar boýunça uly ösüşlere beslenýän häzirki ajaýyp döwrümizde bereketli türkmen topragynyň, edermen daýhanlarymyzyň zähmet ýeňişleriniň şanyna tutulýan Hasyl toýy halkymyzyň iň buýsançly baýramlarynyň biridir.
Häzirki döwürde uly maksatlary nazarlaýan maksatnamalaýyn işler esasynda ata Watanymyzda däneli ekinleriň, pagtanyň, gök-bakja önümleriniň, miweleriň, ir-iýmişleriň bol hasyly ösdürilip ýetişdirilýär hem-de halkymyzyň rysgaly, her bir maşgala ojagynyň berekedi bolup saçaklarymyza dolýar» diýip, döwlet Baştutanynyň Gutlagynda aýdylýar.
«Biz oba hojalyk işgärleriniň, daýhanlaryň ýokary öndürijilikli işlemekleri, toprakdan bol hasyl öndürip, halal zähmeti bilen baýamaklary üçin ähli şertleri döredýäris. Oba hojalyk ekinlerini agrotehnikanyň kadalaryna laýyklykda ösdürip ýetişdirmekde, ýetişdirilen hasyly çalt we ýitgisiz ýygnap almakda daýhanyň daýanjy bolan ýokary öndürijilikli döwrebap, kuwwatly oba hojalyk tehnikalaryny, enjamlaryny we gurallaryny yzygiderli satyn alýarys. Daýhanlary topragyň berekedini artdyrýan mineral dökünler, ýokary hilli tohumlar, ekinleriň zyýankeşlerine garşy ulanylýan himiki serişdeler bilen ýeňillikli bahalardan üpjün edýäris. Önüm öndürijiler bilen tabşyrylýan hasyl üçin hasaplaşyklary öz wagtynda geçirýäris. Merdana oba zähmetkeşleri özleri barada döwletimiz tarapyndan yzygiderli edilýän aladany duýup, joşgunly we ýokary ruhubelentlik bilen yhlasly zähmet çekýärler. Sahawatly türkmen topragyndan ekinleriň bol hasylyny öndürmek arkaly ýurdumyzyň oba hojalygyny ösdürmäge öz mynasyp goşantlaryny goşýarlar» diýip, Serdar Berdimuhamedow belledi.
Hasyl toýy ýurdumyzda her ýylyň noýabr aýynyň ikinji ýekşenbesinde giňden bellenilýär.
