Apple iPhone, Apple Watch we Mac kompýuterleri üçin programma üpjünçiliginiň täze wersiýalaryny çykardy. Olarda ulanyjylar tarapyndan nägilelik bildirilen näsazlyklar düzedildi diýip, GSMARena portaly habar berýär.
iOS 17.1.1-e girizilen düzedişleriň arasynda käbir iPhone 15-de awtomobillerde simsiz zarýad beriş ulanylandan soň Apple Pay we beýleki funksiýalara jogapkär NFC modulynyň işlemezligine getiren näsazlyklaryň düzedilmegi bar.
Apple Watch üçin kompaniýa watchOS 10.1.1 çykardy we onda sagatlaryň käbir modellerindäki akkumulýatoryň has köp sarp edilişi bilen bagly näsazlyk düzedildi. Öň, ulanyjylar gurluşlarynyň akkumulýatorlarynyň zarýadynyň bary-ýogy birnäçe sagatda gutarýandygyna nägilelik bildiripdiler.
Şeýle-de, Apple kompýuterlerinde macOS 14.1.1 täzelenmesi elýeterli boldy. Täze programma üpjünçiliginde M3 çipli täze MacBook Pro noutbuklaryna iň soňky macOS Sonoma wersiýasyna çenli täzelenmäge ýol bermeýän näsazlyk aradan aýryldy.
Apple ähli ulanyjylara durnukly we ygtybarly işi üpjün etmek üçin programma üpjünçiliginiň täze wersiýalaryny gurnamagy maslahat berýär.
