Prezident Serdar Berdimuhamedow «Türkmenistanyň Oba hojalyk ministrliginiň ylmy-barlag institutlaryny döretmek hakyndaky» Karara gol çekdi. Degişli resminama döwlet Baştutany şu gün Hökümet mejlisiniň barşynda gol çekdi. Bu barada «Watan» habarlar gepleşiginde aýdyldy.
Hökümet mejlisiniň barşynda wise-premýer T.Atahallyýew döwlet Baştutanynyň garamagyna degişli kararyň taslamasyny hödürledi. Resminamada ýurdumyzda oba hojalyk ekinleriniň hasyllylygyny ýokarlandyrmak we tohumçylyk işini ylmy esasda ulgamlaýyn alyp barmak göz öňünde tutulýar.
Döwlet Baştutany tohumçylyk işini ylmy esasda ulgamlaýyn alyp barmagy has-da kämilleşdirmegiň wajypdygyny aýdyp, ylmy-barlag institutlarynyň işini döwrebap ýola goýulmagynyň möhümdigini nygtady. Serdar Berdimuhamedow Karara gol çekip, ony wise-premýere sanly ulgam arkaly iberdi we birnäçe tabşyryklary berdi.
