1-nji noýabrda Prezident Serdar Berdimuhamedow ýurdumyza iş sapary bilen gelen Özbegistan Respublikasynyň daşary işler ministri Bahtiýor Saidowy kabul etdi.
Döwlet Baştutany söhbetdeşligiň barşynda Ýewropada Howpsuzlyk we Hyzmatdaşlyk Guramasynyň Baş sekretary bilen Merkezi Aziýa ýurtlarynyň daşary syýasat edaralarynyň ýolbaşçylarynyň düýn geçirilen duşuşygynda ÝHHG bilen köpýyllyk we netijeli hyzmatdaşlygyň ösdürilýändigi bellenildi, bu gurama bilen hyzmatdaşlyk ýylsaýyn giňeldilýär we berkidilýär, ol täze ugurlary öz gerimine alýar.
Serdar Berdimuhamedow söhbetdeşligiň dowamynda Özbegistanyň daşary işler ministriniň Aşgabada şu gezekki saparynyň çäklerinde “Merkezi Aziýa – Koreýa Respublikasy” 16-njy Hyzmatdaşlyk forumynyň işine gatnaşmagynyň dürli ulgamlarda hyzmatdaşlygy işjeňleşdirmegiň ýollary, şeýle hem sebit we halkara syýasatynyň möhüm meseleleri barada pikir alyşmak üçin oňat mümkinçilik döretjekdigini nygtady. Şunuň bilen baglylykda, saparyň jemleriniň iki ýurduň arasynda hemmetaraplaýyn gatnaşyklaryň pugtalandyrylmagyna aýratyn goşant boljakdygyna berk ynam bildirildi.
Serdar Berdimuhamedow pursatdan peýdalanyp, Daşkent şäherinde öňde boljak Ykdysady Hyzmatdaşlyk Guramasynyň 16-njy Sammitiniň üstünlikli geçirilmegini arzuw etdi hem-de onuň netijeleriniň doly derejeli döwletara hyzmatdaşlygynyň mundan beýläk-de ösdürilmegine we çuňlaşdyrylmagyna uly goşant goşjakdygyna ynam bildirdi.
