“Mançester Ýunaýted” soňky maliýe ýylynda 648,4 mln funt sterling ($783,5 mln) möçberde girdeji barada hasabat berdi, bu bolsa Angliýanyň premýer-ligasynda rekorddyr. Bu barada ESPN-e salgylanyp, championat.com habar berýär.
Geçen möwsüm “MÝ-niň” Çempionlar ligasynda däl-de, Ýewropa ligasynda çykyş edendigine garamazdan, umumy girdeji geçen ýyl bilen deňeşdirilende, 11% ýokarlandy. Şeýle-de, klub 42,1 mln funt sterling ($50,9 mln) möçberde ýitgi çekendigini habar berdi.
“Mançester Ýunaýtedde” zähmet haklary üçin çykdajylar bu döwürde 52,8 mln funt sterling ($63,8 mln) - 331,4 mln funt sterlinge ($400 mln) çenli azaldy. Bu düzümdäki üýtgeşmeler we toparyň ÇL-de çykyş etmezligi bilen baglanyşyklydyr. Kluby terk eden iň ýokary hak alýan futbolçylaryň biri Kriştianu Ronaldudy.
Hasabatda klubuň eýelerine – Gleýzerler maşgalasyna we beýleki paýdarlara hiç hili diwidendiň tölenmändigi aýdylýar.
