Russiýada Baş konsul Güýç Garaýewiň ýolbaşçylygyndaky türkmen wekiliýeti özara gyzyklanma bildirilýän meseleleri ara alyp maslahatlaşmak üçin Nižegorod sebitiniň hökümetiniň agzalary bilen duşuşdy. Bu barada “Wremýa N” habarlar agentligine salgylanyp, ORIENT habar berýär.
Taraplar maşyn gurluşygy, metallurgiýa, energetika we transport ýaly ugurlarda üstünlikli hyzmatdaşlygy bellediler. Medeni-bilim gatnaşyklaryna aýratyn üns berildi. Türkmenistan bilen Nižegorod sebiti bar bolan gatnaşyklary giňeltmäge taýýar.
“Biz senagat, infrastruktura we ylym-bilim potensialyny çekmek bilen özara hyzmatdaşlygymyzy giňeltmegiň zerurlygy baradaky umumy pikire geldik. Men şu günki duşuşygyň täze bilelikdäki taslamalary ösdürmek üçin örän gowy esas boljakdygyna ynanýaryn” – diýip, sebitiň gubernatorynyň orunbasary Andreý Sanosýan belledi.
“Nižniý Nowgorodyň ýokary okuw mekdeplerinde Türkmenistandan 600-den gowrak talyp okaýar. Olar “Arzamas gazy”, “Çkalowsk balyk tutmasy” ýaly birnäçe çärelere gatnaşyp, öz ýurduny görkezýärler, şeýle-de dürli olimpiadalarda, konferensiýalarda we bäsleşiklerde rus diline uly gyzyklanma bildirýärler” – diýip, Halkara we sebitara gatnaşyklar ministri Olga Gusewa Türkmenistan bilen bilim hyzmatdaşlygy barada gürrüň etmek bilen belledi.
Türkmen tarapy türkmen-rus gatnaşyklaryny ösdürmek meselelerinde tutanýerliligini görkezip, Türkmenistan bilen Nižegorod sebitiniň arasynda işewür toparlary alyşmagy meýilleşdirýändigini belledi.
