Mojang kompaniýasy Minecraft oýnunyň 300 mln nusga tiraž bilen satylandygyny habar berdi. Muny WindowsCentral portalyna salgylanyp, gazeta.ru ýetirýär.
Mojang-yň maglumatlaryna görä, oýun dürli platformalarda satylyp, 300 mln nusga belliginden geçdi. Bu onuň ýakyn bäsdeşi bolan Grand Theft Auto V oýnundan 115 mln nusga köpdür.
Soňky iki ýarym ýylda Minecraft-yň satuwy 26% ýokarlandy. Ýagny, 2021-nji ýylyň aprel aýynda Mojang oýnuň şol wagt 238 mln nusga bilen satylandygyny habar berdi. Şeýlelik bilen, häzire çenli oýnuň ýene 62 mln nusgasy satyldy.
Geljek ýyl Minecraft oýnuna 15 ýyl dolýar. Şu mynasybetli Mojang 2024-nji ýylyň dowamynda dürli çäreleri we täzelenmeleri geçirmegi meýilleşdirýär.
Minecraft – sandbox žanryndaky kompýuter oýny bolup, şwesiýaly programmist Markus Persson tarapyndan döredildi we onuň Mojang AB studiýasy tarapyndan çykaryldy. Ol ilkinji gezek 2009-njy ýylda hödürlendi. Bäş ýyldan soň Microsoft 2,5 mlrd dollara Mojang AB studiýasy bilen bilelikde Minecraft oýnuna hukuk satyn aldy.
