2023-nji ýylyň martynda 90 ýaşyny bellän britan aktýory Maýkl Keýn kinodan çekiljekdigini habar berdi. Ol «BBC» radiosyna beren täze söhbetdeşliginde: «Men pensiýa çykýaryn diýip hemişe aýdýaryn. Şeýlelikde, indi men gitdim» diýip, belledi.
2023-nji ýylda Keýniň gatnaşan soňky filmi – Oliwer Parkeriň «Uly gaçgak» filmi çykar. Onda Keýn goşunyň Normandiýa düşürilmeginiň ýubileýine gatnaşmak üçin garrylar öýünden gaçýan Ikinji jahan urşunyň weteranynyň keşbini janlandyrar.
«Men pikirlendim: meniň baş rollarda oýnan filmlerim boldy, olar ajaýyp teswirleri aldylar... Mundan öňe näme geçip biler? Indi maňa diňe 90 ýaşly adamlaryň keşpleri hödürlener. Belki, 85 ýaşly hem bolup biler» diýip, ol pikirlerini paýlaşdy.
Keýn baş rollaryň garry aktýorlara hödürlenmejekdigine düşünýär.
«90 ýaşly baş gahrymanlar ýok, ýaş we owadan oglan-gyzlar bar. Şol sebäpli men oýlandym we gitmeli diýen karara geldim» diýip, Keýn belledi. Ol «Uly gaçgak» filminden öň üç film teklibini ret edipdi.
