Heniz tanyşdyrylmadyk «Samsung Galaxy S24 Ultra» flagmany smartfonyň ilkinji netijesini hasaba alan «Geekbench» bençmarkynda (görkezijiler sanawynda) peýda boldy. Bu barada «GizmoChina» habar berýär.
«Geekbench-iň» maglumatlar bazasynda smartfonyň 2023-nji ýylyň 24-nji oktýabrynda tanyşdyryljak iň täze «Snapdragon 8 Gen 3» prosessory bilen üpjün ediljekdigi mälim boldy. Çipde sekiz ýadro bolar: biri 3,3 GGs takt ýygylygy bolan «Cortex-X4» ýadrosy, 3,15 GGs takt ýygylygy bolan üç sany «Cortex-A720» ýadrosy, 2,96 GGs takt ýygylygy bolan iki sany «Cortex-A720» ýadrosy we 2.27 GGs takt ýygylygy bolan iki sany «Cortex-A520» ýadrosy.
«Geekbench-de» «Samsung Galaxy S24 Ultra» smartfony bir ýadroly we köp ýadroly režimlerinde, degişlilikde, 2234 ball we 6807 ball toplady. Deňeşdirsek: «Snapdragon 8 Gen 2» bilen işleýän häzirki «Galaxy S23 Ultra» bir ýadroly režiminde 1895 ball, köp ýadroly režiminde bolsa 5062 ball toplapdy.
Bellenilmegine görä, «Samsung» «Galaxy S24 Ultra-nyň» «Exynos 2400» prosessorly wersiýasyny hem taýýarlaýar. Onuň öndürijilik mümkinçilikleri barada heniz maglumat ýok.
«Samsung Galaxy S24 Ultra-nyň» tanyşdyrylyş dabarasy 2024-nji ýylyň başynda bolar.
