«Xiaomi» «Qualcomm» maslahatynyň yzyzsüre flagman smartfonlarynyň indiki neslini tanyşdyrmagy meýilleşdirýär. Bu barada Hytaýyň ITHome portaly habar berýär.
«Xiaomi» «Snapdragon 8 Gen 3» çipi esasynda işleýän täze enjamlary yglan eden ilkinji öndüriji bolmak isleýär. Munuň üçin «Xiaomi» 27-nji oktýabrda, çipleriň täze nesli tanyşdyryljak «Qualcomm» maslahaty tamamlanandan bir gün soň özüniň täze önümlerini görkezer. Şeýlelikde, «Xiaomi 14» we «14 Pro» geçen ýylkydan bir aý çemesi öň tanyşdyrylar.
«Xiaomi-niň» flagman smartfonlary täzelenen dizaýn, «Leica» kameralary we Android 14 esasly öňünden gurlan «MIUI 15» programma üpjünçiligi bilen üpjün edilýär. Käbir maglumatlara görä, «Xiaomi 14 Pro» titan çarçuwasy hem-de hemra aragatnaşygy üçin goldaw ulgamy bilen üpjün ediler. Şeýle-de uly wersiýanyň bazardaky iň dar çarçuwaly ekran bilen üpjün ediljekdigi, onuň galyňlygynyň bary-ýogy 1 mm boljakdygy habar berilýär. Bu görkezijä görä, hytaý enjamy çarçuwalarynyň galyňlygy 1,55 mm bolan «iPhone 15 Pro-dan» öňe geçer.
27-nji oktýabrda «Xiaomi 14» we «14 Pro-nyň» hytaý görnüşleriniň tanyşdyrylyş dabarasyna garaşylýar. Global modeller bazara 2024-nji ýylda çykarylyp biler.
