Ykjam aragatnaşyk operatorlarynyň assosiasiýasy GSMA ykjam internetiň ýagdaýy baradaky ýyllyk hasabatynda dünýäde smartfon eýeleriniň sanynyň 4,3 mlrd adama ýetendigini habar berdi. Bu Ýer ýüzüniň ýaşaýjylarynyň, takmynan, 55%-ine deňdir diýip, gazeta.ru belleýär.
Gözleglere laýyklykda, 4,6 mlrd adam internet ulanyjylary bolup, olardan 4 mlrd adam internet toruna smartfonlaryň kömegi bilen birigýär. Galan 600 mln adam internete çykmak üçin adaty telefonlary ulanýar.
Şeýle-de bolsa, Ýeriň ilatynyň 92%-iniň öýjükli aragatnaşyk örtügi bolan zolaklarda ýaşaýandygyna garamazdan, takmynan, 3,4 mlrd adamyň henizem internete elýeterliligi ýok. Internete girip bilmeýän adamlaryň arasynda Gara Afrikanyň 59% ilaty we Günorta Aziýanyň 52% ilaty görkezilýär.
Şeýle-de, sebite baglylykda internete birikmegiň hilinde we tizliginde-de ep-esli tapawutlar bar. Mysal üçin, ABŞ-da, Ýuwaş umman sebitinde we Gündogar Aziýada smartfon ulanyjylaryň 69%-i 4G toruna birigýär, Afrikada we Ýakyn Gündogar ýurtlarynda bolsa ulanyjylaryň köpüsi häzirki günde könelişen üçünji nesliň torlaryndan peýdalanýarlar.
