Deňizdäki leňňeç duzaklarynyň sanyny azaltmak kitleri goramakda has ösen çärelerden, şol sanda olaryň sanyna hakyky wagtda gözegçilik etmekden has täsirlidir. Santa-Barbara şäherinde ýerleşýän Kaliforniýa uniwersitetiniň amerikan alymlary şeýle netijä geldiler.
«Biz balykçylyk pudagyna uly täsir etmezden, kitleriň sanynyň azalmagynyň öňüni almak üçin dolandyryş strategiýalarynyň haýsy görnüşleriniň has gowy netije berjekdigini anyklamaga synanyşýardyk. Ýüpli balyk duzaklarynyň mukdaryny azaltmak ýaly ýönekeý çözgütleriň çylşyrymly usullardan has netijelidigini gördük» diýip, gözlegiň awtory Kristofer Fri belledi.
Leňňeç duzaklarynyň özi ullakan kitlere howp salmaýar, ýöne deňiz ägirtleri köplenç duzaklary ýokary çekmek üçin ulanylýan berk ýüplere çolaşýarlar.
Hünärmenler leňňeç duzaklarynyň sanyna, kitleriň özüni alyp barşyna we leňňeççilik pudagyna esaslanyp, kitleri leňňeç duzaklaryndan goramagyň dürli usullaryny öwrenmek üçin kompýuter modelini döretdiler. Olar duzaklaryň sanyny 30% azaltmak çolaşmalary iň pes derejä çenli azaldar diýen netijä geldiler.
