Seýrek «Leica 0-Series» kamerasy «Wetzlar Camera Auctions» auksionynda satuwa çykaryldy. Hünärmenler enjamyň bahasynyň 1,5 million ýewrodan 2 million ýewro çenli boljakdygyny çaklaýarlar.
Auksion öýüniň wekilleri enjamyň ilkibaşdaky asyl gara reňkiniň «örän gowy ýagdaýda» saklanandygyny bellediler. Enjam bilen bilelikde obýektiwiň asyl deri gapagy we katuşkasy hem berilýär. «Taryhy kamera we örän seýrek gymmatlyk!» diýip, auksiony guraýjylar web sahypasynda bellediler.
Ýüz ýyl öň, 1923-nji ýylda 35mm plýonkaly «Leica 0-Series» kamerasynyň 23 sany synag nusgasy öndürildi. Netijede, olar diňe bir 1925-nji ýylda çykan rowaýaty «Leica I» kamerasynyň däl, eýsem, «Leica-nyň» ähli 35mm plýonkaly kameralarynyň prototipine öwrüldiler.
Mundan başga-da, auksionda 1934-nji ýyldaky «Leica IIIc» kamerasynyň prototipi we Kataryň şeýhi Saud bin Muhammed Al Tani üçin ýörite döredilen «Leica M7» titandan kamera hem ýerlener. Enjamlaryň satuwy 2023-nji ýylyň 7-nji oktýabrynda Wetzlar (Germaniýa) şäherinde geçiriler.
