Daniýanyň Lego oýnawaç öndürijisi konstruktorlaryna nebitden ýasalan bölekleri goşmazlyk pikirinden ýüz öwürdi diýip, kompaniýanyň başlygy Nils Kristianseniň sözlerine salgylanýan Financial Times ýazdy.
Iki ýyl mundan ozal Lego öz konstruktorlarynyň 80%-inde ulanýan nebit esasly ABS plastmassasyndan däl-de, gaýtadan işlenen plastik gaplardan öndürilen bölekleri synagdan geçirmegi tamamlandygyny mälim edipdi. Her ýyl ol şeýle bölekleriň milliardlarçasyny öndürýär.
Şeýle-de bolsa, täze materialdan - gaýtadan işlenen polietilentereftalatdan (RPET) peýdalanmak önümiň ömrüniň dowamynda uglerod zyňyndylarynyň artmagyna getirjek täze enjamlary talap edýär diýip, Kristiansen belleýär.
Netijede, Lego 1 kg öndürmek üçin takmynan 2 kg nebit gerek boljak ABS plastmassasynyň uglerod yzyny azaltmaga synanyşdy.
"Ilkibaşda daşky gurşawa zyýan ýetirmejek şeýle jadyly materialy ýa-da täze materialy tapmak aňsat ýaly görünýärdi, emma görýäs welin, bu beýle däl eken" -diýip kompaniýanyň başlygy mälim etdi.
"Biz ýüzlerçe materialy synagdan geçirdik - diýip, ol gazete düşündirdi. - Şeýle zady tapmak başardaýanok".
Lego 2030-njy ýyla çenli öz oýun toplumlarynda ulanylýan, takmynan, 20 materialdan nebit esasly plastmassalary aýyrmak isleýär. Hususan-da, ol 2018-nji ýylda nebit esasly polietileni, agajy we gyrymsy agajy hem öz içine almak bilen, 20 töweregi bölekde ulanylýan ösümlik esasly çig mal bilen çalyşdy.
Mundan başga-da, öndüriji 2025-nji ýyla çenli bölekleri bir gezeklik plastik paketlere gaplamakdan ýüz öwürmek üçin çäreleri görýär. Häzirki wagtda köp sanly oýun toplumlary kagyz gaplamalarda hödürlenýär.
