Psihologlaryň gözlegleri daşary ýurt dillerinde gürleýän adamlaryň kyn ýagdaýlarda has çalt çözgüt tapýandygyny görkezdi. Haçan-da adam özi üçin ene dili bolmadyk dilde pikirlenende, ol ýagdaýa has tankydy baha berýär.
Çikago uniwersitetiniň bilim programmasynyň başlygy, professor Boaz Keýsar daşary ýurt dilini ulanmagyň dartgynly ýagdaýlarda çözgüt kabul etmek prosesini nähili üýtgedýändigini anyklady. Bu barada "The Guardian" habar berýär.
Tejribä gatnaşyjylara saýlamak üçin iki wariant hödürlendi: puly aljakdyklaryna 50% ähtimallyk bilen £2,5 ýa-da kepillendirilen £1. Gatnaşyjylaryň köpüsi ikinji warianty saýlady.
Gatnaşyjylar üçin daşary ýurt dilinde geçirilen şular ýaly tejribe, meýletinçileriň töwekgelçilik etmäge has taýýardyklaryny görkezdi. Keýsaryň aýtmagyna görä, tejribeden geçýänler daşary ýurt dilinde gürlänlerinde bolup biljek ýitgiler barada az alada edýärdiler.
Psihologyň dowamly tejribeleri adamyň ene dili bolmadyk dile geçen ýagdaýynda has ünsli bolýandygyny görkezdi. Bu onuň näme we nähili gürleýändigi barada pikirlenmeli bolýandygy bilen baglanyşyklydyr.
Italiýadaky Trent uniwersitetinden psihologiýa professory Silwiýa Purpuri daşary ýurt diliniň dartgynly ýagdaýlarda adamyň özüni alyp barşyna nähili täsir edýändigini öwrendi. Daşary ýurt dili üýtgeýän gurşawa çalt uýgunlaşmaga mümkinçilik berýär, bu bolsa öz gezeginde, öndürijiligi ýokarlandyrýar.
Keýsar diliň üýtgemegi pikirlenişi üýtgetmek üçin gowy gural bolup biler diýip hasaplaýar. Başga bir dile geçmek kyn çözgütleri kabul etmekde has obýektiw bolmaga kömek edýär.
