Starlink Ýewropadaky we Okeaniýa ýurtlaryndaky ulanyjylaryň arasynda iň meşhur internet serwisleriniň biri hökmünde öz ornuny saklamagyny dowam etdirýär diýip, ferra.ru belleýär. Birnäçe ýylyň dowamynda taslama dünýäde iň uly hemra toparyny döredip, dünýädäki onlarça ýurtlara hyzmatlary hödürledi.
Speedtest Intelligence-niň maglumatlaryna görä, Beýik Britaniýadan, Täze Zelandiýadan, Fransiýadan, Italiýadan we Germaniýadan ulanyjylar Starlink-e adaty internet hyzmatlaryny üpjün edijilere garanda has ýokary baha berýärler. Bu maglumatlar Maskyň hemra ulgamyny beýlekilere maslahat berýän ulanyjylaryň baha bermelerine esaslanýar.
Starlink tarapyndan hödürlenýän Internetiň tizligi Ýewropada geçen ýyl birneme pese gaçyşdan soň durnuklaşdy.
2023-nji ýylyň II çärýeginde 27 Ýewropa ýurdunyň 14-üsinde tizlik sekuntda 100 Mbit-den geçdi. Iň ýokary ortaça ýükleme tizligi Şweýsariýada hasaba alyndy – sekuntda 122 Mbit.
Mundan başga-da, Starlink 11 ýurtda, şol sanda Beýik Britaniýada, Gresiýada, Irlandiýada we Italiýada adaty internet hyzmatlaryny üpjün edijilerden has ýokary tizligi görkezdi.
