2017-nji ýylda ösüşiniň iň ýokary derejesinde bolan global smartfon bazarynda 700-den gowrak brendiň arasynda güýçli bäsdeşlik gidýärdi. 2023-nji ýyla çenli satuw göwrümi tassyklanan işjeň smartfon öndürijileriniň sany üçden iki bölek, tas 250-ä çenli azaldy. Şeýle maglumatlary 70-den gowrak döwletde smartfon satuwyny yzarlaýan Counterpoint analitik kompaniýasy getirýär diýip, 3dnews.ru belleýär.
Ösýän ulanyjy bazasy, gurluşlaryň hiliniň kämilleşdirilmegi, gajet çalşygy üçin has uzak sikller, ykdysady päsgelçilikler, 4G-den 5G-e geçiş ýaly uly tehnologiki geçişler ýyllarboýy işjeň brendleriň sanyny kem-kemden azaltdy. Hindistandaky Micromax we Bangladeşdäki Symphony ýaly köp sanly ýerli smartfon öndürijileri soňky bäş ýylda ep-esli paýlaryny ýitirdiler ýa-da bazary terk etdiler.
Smartfon öndürijileriniň sanynyň azalmagy, esasan, ýerli brendleriň hasabyna bolup geçýär, global kompaniýalaryň sany bolsa durnuklylygyna galýar. Ýerli brendler diňe Aziýa-Ýuwaş umman sebiti, Latyn Amerikasy, Ýakyn Gündogar we Afrika ýaly fragmentirlenen bazarlary bolan sebitlerde arzan gurluşlaryň bazarynda satuwlaryny saklaýarlar.
Çalt ösýän smartfon pudagynda uly bolmadyk kompaniýalaryň gözleglere we işläp düzmelere, önümçilige we potensialy artdyrmaga maýa goýmak mümkinçilikleri ýok. Mundan başga-da, kiçi brendleriň köpüsinde sport we kino dünýäsinden meşhur adamlaryň gatnaşmagynda global premýeralary hem-de uly mahabat we marketing çärelerini geçirmäge serişdeler ýok.
