Toyota Motor kompaniýasy ýygnalan ýeňil awtomobilleri daşamak üçin ýük robotlaryny işe girizip başlady. Ilkinji robot sentýabr aýynda Motomati flagman zawodynda işläp başlady. 2024-nji ýylyň ahyryna çenli Motomati zawodynda şeýle ýük robotlaryndan 10 sanysy hereket eder diýip, ixbt.com habar berýär.
Olaryň ulanylyşyny kem-kemden kompaniýanyň beýleki kärhanalaryna-da ýaýratmak meýilleşdirilýär. Bu robotlar Vehicle Logistics Robot (VLR) adyny aldy. Olar awtomobiliň/teker bazasynyň beýikligine baglylykda ýük platformasyny galdyryp, aşak düşürip, süýşürip we aýryp bilýärler, bu hem dürli ululykdaky ulag serişdelerini daşamaga mümkinçilik berýär.
Şeýle-de, robotlar öz platformalaryna diňe ýygnalan täze awtoulaglary ýerleşdirip, olary diler merkezlerine ibermek üçin ýükleme nokadyna eltýärler. Zawodyň çäginde hereket edende enjam awtomatiki nawigasiýa ulgamyndan peýdalanýar.
Ýokary derejede takyk awtonom hereketden başga-da, kompýuter ulgamy merkezleşdirilen ýagdaýda birnäçe robotyň hereketini dolandyrýar, howpsuzlyga gözegçilik edýär we daşama prosesini optimal ugurlar boýunça üpjün edýär.
Mundan başga-da, adaty sürüjili awtomobillerden tapawutlylykda, häzirki ýagdaýda gapylary açmak we ýapmak zerurlygy ýok bolup, bu ulaglary boşluksyz ýerleşdirmäge we zawodyň çägini has netijeli ulanmaga mümkinçilik berýär.
