22-nji sentýabrda, şu gün Türkmenistanyň Prezidenti Serdar Berdimuhamedowyň we Özbegistan Respublikasynyň Prezidenti Şawkat Mirziýoýewiň arasynda telefon söhbetdeşligi boldy. Bu barada özbek lideriniň resmi saýty habar berýär.
Dostlukly ýurduň lideri Türkmenistanyň Baştutanyna berk jan saglyk, bagt we özygtyýarly Watanyň gülläp ösmegine hem-de türkmen halkynyň abadançylygyna gönükdirilen köp ugurly we jogapkärçilikli döwlet işlerinde üstünlik arzuw edip, doglan güni bilen tüýs ýürekden gutlady.
Doglan güni mynasybetli mähirli gutlaglar we hoşniýetli arzuwlar üçin tüýs ýürekden minnetdarlyk bildirip, Prezident Serdar Berdimuhamedow Türkmenistanyň dostlukly ýurdy bolan Özbegistan bilen gatnaşyklaryna ýokary baha berýändigini aýtdy. Bellenilişi ýaly, soňky ýyllarda iki ýurduň arasyndaky hyzmatdaşlyk giň ugurlarda ösüp, hil taýdan täze derejä çykdy.
