Kriptowalýutalary ornaşdyrmak üçin iň taýyn ýurtlaryň we sebitleriň sanawynda Gonkong birinji ýeri eýeledi. Salgydyň bolmazlygy, kriptowalýuta awtomatlarynyň we kriptokompaniýalaryň köp sanly bolmagy ýurda öňe saýlanmaga mümkinçilik berdi.
Forex Suggest dellalçylyk kompaniýasynyň seljerileri tarapyndan düzülen Worldwide Crypto Readiness Report hasabatynda görkezilişine görä, kriptowalýutalary ornaşdyrmakda iň taýyn ýurtlaryň we sebitleriň sanawynda Gonkong birinji orny eýeledi. Gonkong - Hytaýyň ýörite administratiw sebiti.
Gonkong Forex Suggest-iň reýtinginde yzly-yzyna iki ýyl bäri birinji ýerde durýar. 2023-nji ýylda şäher mümkin bolan 10 baldan 8,36 bal gazandy. Gonkong 0% salgyt stawkasy, köp sanly kriptowalýuta awtomatlary we bu ugurda işleýän kompaniýalar arkaly şeýle ýokary bala eýe boldy.
Şweýsariýa 8,18 bal bilen ikinji ýeri eýeledi, geçen ýyl ýurt üçünji ýeri eýeläpdi. Şweýsariýada köp sanly kriptowalýuta we blokçeýin kärhanalary bar hem-de raýatlar kriptowalýuta ulanmaga gyzyklanma bildirýärler diýip, Worldwide Crypto Readiness Report-yň awtorlary ýazýarlar.
ABŞ 7,25 bal bilen üçünji ýerde durýar. Ýurtda kriptowalýuta bankomatlary köp, ýöne ştatlar kriptowalýutalary durmuşa ornaşdyrmakda taýýarlygyň dürli derejelerini görkezýärler. Ilkinji onluga Gruziýa, Sloweniýa, Kanada, Awstraliýa, Germaniýa, Bolgariýa we Panama girdi. Şol bir wagtyň özünde Sloweniýa, Kanada, Awstraliýa, Germaniýa hem-de Bolgariýa ilkinji onluga birinji gezek girdiler.
Reýtingiň awtorlary kriptowalýuta bankomatlarynyň sanyny, bu ugurdaky kanunçylyk düzgünlerini, salgyt salnyşyny, kriptowalýuta we blokçeýin kompaniýalarynyň sanyny, şeýle hem raýatlaryň sanly walýutalara bolan gyzyklanmasyny göz öňünde tutdy.
