Režissýor Kristofer Nolanyň atom bombasyny dörediji baradaky “Oppengeýmer” biografik filmi dünýä prokatynda 912 mln dollar ýygnap, baýopikleriň arasynda öňki rekord eýesini – Freddi Merkýuri baradaky “Bogema rapsodiýasy” filmini yzda galdyrdy. Bu barada rbclife.ru habar berýär.
“The Wrap” neşiri tarapyndan getirilýän maglumatlara görä, sazanda baradaky filmiň girdejisi 2018-nji ýylda 902 mln dollar boldy. Geçen dynç günleri Robert Oppengeýmer hakyndaky biografik filmiň girdeji ýygymy bu mukdardan 10 mln dollardan gowrak ýokary boldy. Bellenilişi ýaly, lenta studiýanyň garaşanyndan ýokary netije görkezdi. Prodýuserler Kristofer Nolanyň ekrana çykandan soň dünýäde 525 mln dollar ýygnan “Dýunkerk” filminiň derejesinde girdeji almaga garaşypdylar.
Häzir “Oppengeýmer” 2023-nji ýylda iň köp girdeji getiren üçünji film we Nolanyň karýerasyndaky iň köp girdeji gazanan üçünji film boldy. Diňe “Gara rysar” we “Gara rysar: Rowaýatyň gaýtadan döreýşi” bu üç sagatlyk biografik filmden öňde durýar. Nolanyň “Oppengeýmer” filmi kinoteatrlarda ilkinji hepdede amerikan prokatynda günde 10 mln dollardan gowrak girdeji ýygnan R reýtingli (diňe ulular üçin) ilkinji film boldy.
Taryhy dramada baş keşbi Kilian Mýorfi ýerine ýetirdi. Bu onuň Nolan bilen ilkinji hyzmatdaşlygy däl – öň aktýor režissýoryň “Başlangyç” we “Dýunkerk” filmlerinde-de surata düşdi.
