Garyşyk söweş sungatynyň (MMA) russiýaly söweşijisi Fýodor Ýemelýanenkonyň gahrymany EA Sports kompaniýasy tarapyndan işlenip düzülen UFC 5 oýnunda peýda bolar. Bu barada TASS habar berdi.
Ýemelýanenkodan başga-da, giňeldilen neşiriň eýeleri goşmaça gahrymanlar hökmünde boksçy Maýk Taýsony we Muhammet Alyny alarlar.
Ýemelýanenko 46 ýaşynda, MMA-da 40 ýeňşi we 7 ýeňlişi bar, ýene bir söweşi hasaba alynmady. Ol Pride, Rings we WAMMA guramalarynyň çempiony, dört gezek dünýä çempiony we söweş sambosynda dokuz gezek Russiýanyň çempiony boldy.
Taýson 57 ýaşynda; professional halkada 50 ýeňiş gazandy (44 nokaut bilen) we 6 ýeňlişi bar. Amerikaly bu söweşiji super agyr agram derejesinde dünýä çempiony boldy we Bütindünýä boks geňeşiniň, Bütindünýä boks birleşiginiň we Halkara boks federasiýasynyň dünýä çempiony guşaklarynyň eýesi boldy.
Muhammet Aly 1942-nji ýylda doglan, dünýä inende oňa Kassius Kleý-kiçi ady dakylypdy, ýöne 1964-nji ýylda yslam dinini kabul edeninden soň ony üýtgetdi. Ali 1960-njy ýylda ýarym agyr agramda Olimpiýa çempiony, agyr agramda dünýäniň absolýut çempiony (1964-1966, 1974-1978) boldy. Boksçy 61 söweşe gatnaşyp, olaryň 56-synda ýeňiş gazandy (37-si nokaut bilen). Aly 2016-njy ýylda aradan çykdy.
